Hætta á að allt fari í bál og brand í Líbíu að nýju

Gífurleg vinna bíður næstu stjórnar Líbíu, bæði pólitíkst og efnahagslega. Lítið má út af bera til að allt fari í bál og brand í landinu að nýju.

Í umfjöllun Politiken um nánustu framtíð Líbíu segir Ulla Holm, sérfræðingur í málefnum landsins, að bráðabirgðastjórn uppreisnarmanna hafi aðeins um tvær vikur til þess að hindra það að gleðin yfir falli Gaddafi breytist í vantraust og átök milli mismunandi fylkinga og ættarhópa í landinu.

Ljóst er að málin geta mjög fljótt þróast á verri veg sérstaklega ef ekki tekst að stöðva hefndaraðgerðir fólks sem varð illa fyrir barðinu á stjórn Gaddafi gegn því fólki sem naut góðs af þeirri stjórn.

Hvað efnahagsmálin varðar kemur fram í umfjöllun á CNNMoney að fyrst og fremst þurfi að koma olíuframleiðslu landsins á fullt skrið að nýju en að slíkt geti tekið langann tíma.

Olíuframleiðslan er þegar komin í 350.000 tunnur á dag og auðvelt ætti að vera að tvöfalda þá tölu mjög fljótlega. En að ná framleiðslu upp á 1,6 milljón tunnur eins og hún var áður en uppreisnin hófst getur tekið tvö til þrjú ár að mati sérfræðinga.