Tala látinna komin í 279 í Tyrklandi

Tala látinna í jarðskjálftunum í Tyrklandi er komin í 279 manns og rúmlega 1.300 liggja slasaðir. Mörg hundruð manna er enn saknað.

Yfir 2.000 björgunarmenn leita að fólki í rústunum í borgunum Van og Ercis sem urðu verst úti. Þúsundir borgarbúa hafast við í tjöldum í borginni þrátt fyrir mikinn kulda. Samkvæmt erlendum fjölmiðlum fundust fimm manns á lífi í húsarústum í Ercis í gærdag og einn fannst í Van í gærkvöldi.

Yfirvöld í Tyrklandi hafa lofað meiri aðstoð við fólk á jarðskjálftasvæðunum og verða 12.000 tjöld send til Van og Ercis í dag.