Risavopn Bandaríkjanna tekið í sundur

B53 kjarnorkusprengjan er öflugasta kjarnavopn Bandaríkjanna og í dag verður síðasta eintakið tekið í sundur. Bandaríkin eiga þó enn rúmlega 1.500 kjarnorkusprengjur.

Sprengjan er 600 sinnum öflugari en kjarnorkusprengjan sem sprengd var í Hiroshima árið 1945.

Sprengjan verður tekin í sundur í Amarillo en það er eina verksmiðja Bandaríkjanna þar sem kjarnorkusprengjur eru settar saman og teknar í sundur. Aftenging sprengjunnar er á undan áætlun og er í takt við markmið Baracks Obama, Bandaríkjaforseta, um að fækka kjarnavopnum í landinu.

Thomas D'Agostino, stjórnandi kjarnorkustofnunarinnar, sagði eyðingu sprengjunnar marka þáttaskil.

B53 sprengja er á stærð við sendiferðabíl og voru B-52 sprengjuflugvélar notaðar til að ferja hana.