Kortleggja erfðamengi 115 ára konu

Erfðamengi 115 ára konu hefur nú verið kortlagt af vísindamönnum til að komast að galdrinum á bak við langlífið.

Vísindamenn segja að konan, sem var sú elsta í heiminum er hún lést, hafi ekki sýnt nein merki um elliglöp og haft andlegt þrek á við manneskju mörgum áratugum yngri.

Greint var frá þessu á vísindaráðstefnu í Kanada í gær. Um það bil tíu ár eru síðan vísindamenn raðgreindu að fullu erfðamengi mannsins, en síðan þá hefur erfðamengið verið raðgreint í nokkur hundruð einstaklingum, að því er BBC greinir frá.

Aldrei fyrr hefur erfðamengið verið raðgreint í svo aldraðri manneskju, en konan hafði gefið vísindamönnum vilyrði fyrir rannsókn á líkama sínum og líffærum þegar hún væri horfin yfir móðuna miklu.