Gucci tískuvörur sagðar framleiddar í þrælakistum

Starfsmenn í kínverskri verksmiðju, sem framleiðir Gucci tískuvörur, hafa sent yfirvöldum og fjölmiðlum opið bréf, þar sem þeir halda því fram að verksmiðjan sé í raun þrælakista.

Verksmiðjan er í kínversku borginni Shenzhen en fimm fyrrverandi starfsmenn skrifa undir bréfið.

Þar er því haldið fram að óléttar konur hafi verið neyddar til þess að vinna í fjórtán klukkustundir samfleytt án þess að fá vott né þurrt á meðan. Þetta hafi leitt til þess að starfsmenn hafi misst fóstur.

Þá er því einnig haldið fram að starfsmenn hafi þurft að spyrja hvort þeir mættu fara á klósettið.

Gucci er í eigu franska fyrirtækisins Pinault-Printemps-Redoute. Forsvarsmenn þar segjast taka ásökunum mjög alvarlega og hafa hrundið af stað rannsókn innan fyrirtækisins, auk þess sem tveimur yfirmönnum hefur verið sagt upp störfum samkvæmt The Daily Telegraph.

Yfirvöld í Kína rannsaka einnig málið.

Ásakanirnar nú koma skömmu eftir annað hneyksli hjá fyrirtækinu Foxconn, sem setur saman iPhone síma á vegum Apple fyrirtækisins. Þar varð sjálfsmorðshrina á meðal starfsmanna sem talið er að megi rekja til aðstæðna í vinnunni.