Stórbruni í Kaupmannahöfn

Allt tiltækt slökkvilið Kaupmannahafnar berst nú við stórbruna á iðnaðarlóð í Rödovre, einu úthverfa borgarinnar.

Slökkvilið var kallað út skömmu fyrir klukkan tvö í nótt að staðartíma. Fjögur stór hús eru á lóðinni og er eitt þeirra, geymslubygging, brunnið til grunna og annað um það bil að fara sömu leið.

Samkvæmt fréttum í dönskum fjölmiðlum er ekki vitað til að manntjón hafi orðið í brunanum. Slökkvilið telur að ekki verði búið að ráða niðurlögum eldsins fyrr en undir hádegið í dag.