Fjöldi villidýra skotinn

Það varð uppi algjör ringulreið í Zanesville í Ohio í dag þegar villidýr sem voru lokuð inni á einum bænum þar sluppu út. Lögregluna grunar að bóndinn á bænum, Terry Thompson, hafi sleppt dýrunum og svo svipt sig lífi. Um 50 manna lögreglulið fór strax á stúfana og skaut að minnsta kosti þrjátíu dýr. Þar á meðal voru ljón, tígrisdýr, úlfar og birnir.

Eftir því sem Ritzau fréttastofan greinir frá var Thompson þessi enginn engill. Hann var þekktur fyrir að eiga mikið af vopnum, eða um 130 og hafði verið fangelsaður fyrir að hafa undir höndum skotvopna sem hann hafði ekki leyfi fyrir. Hann hafði áður fengið dóm fyrir slæma meðferð á dýrum.