Adebayor ætlar að passa sig ef hann skorar hjá Arsenal

Emmanuel Adebayor verður í sviðsljósinu á White Hart Lane á morgun þegar hann og félagar hans í Tottenham taka á móti Arsenal í stórleik helgarinnar í ensku úrvalsdeildinni.

Emmanuel Adebayor skoraði í fyrsta leiknum sínum með Tottenham alveg eins og hann gerði hjá Arsenal, Manchester City og Real Madrid. Adebayor skoraði líka tvennu í sigrinum á Liverpool og Tottenham hefur unnið alla deildarleikina með hann innanborðs.

Það er þó ekki bara þessi góða byrjun sem kallar á athygli heldur umdeilt atvik í leik Manchester City og Arsenal í september 2009 þegar Adebayor skoraði hjá sínum gömlu félögum. Adebayor hljóp þá völlinn á enda til þess að fagna markinu fyrir framan stuðningsmenn Arsenal sem höfðu hraunað yfir hann allan leikinn.

„Þegar ég samdi við Tottenham þá sagði Alex Song við mig: Adebayor, þú ert að gera þetta viljandi út af því að þetta eru helstu erkifjendur Arsenal. Ég sagði, nei félagi, ég er fagmaður og Tottenham er eina félagið í boði fyrir mig. Það er frábær klúbbur og ég er kominn aftur til fjölskyldunnar. Það verður gaman að spila á móti þér," sagði Emmanuel Adebayor.

„Ég mun skora á móti Arsenal ef ég fæ tækifæri til þess. Ég mun hinsvegar ekki fagna markinu eins og ég gerði um árið," sagði Adebayor sem hefur beðið alla nokkrum sinnum afsökunar á framkomu sinni.

Harry Redknapp, stjóri Tottenham, var einn af fáum sem kom Adebayor til varnar á sínum tíma og honum er alveg sama hvernig hann fagnar á morgun.

„Hann hefur viljað spila fyrir Tottenham síðan að hann var þriggja ára gamall. Honum varð að ósk sinni og ég von að hann skori nokkur mörk í þessum leik og fagni þeim með því að renna sér á hnén. Mér er í raun sama hvernig hann fagnar ef ég segi alls eins og er," sagði Harry Redknapp.