Hvert getur Carlos Tevez farið í janúar?

Carlos Tevez mun örugglega fara frá Manchester City í janúar en hvert getur litli argentínski vandræðagemlingurinn farið eftir allt það sem á undan er gengið.

Roberto Mancini býst við að Manchester City þurfi að selja hann ódýrt og telur að félagið fái ekki meira en 20 milljónir punda fyrir hann. Það er aðeins helmingur þess sem eigendur City telja sanngjarnt söluverð.

Mörg félög gætu því keypt kappann fyrir slíka upphæð en þau eru ekki mörg sem geta borgað honum 250 þúsund pund í vikulaun eða 46 milljónir íslenskra króna fyrir hverja sjö daga í starfi.

Guardian hefur tekið saman möguleikana fyrir Carlos Tevez sem eru örugglega langt frá því að vera fullnægjandi fyrir leikmanninn.



Möguleikarnir fyrir Carlos Tevez

England - Félög eins og Chelsea gætu ráðið við að borga Tevez þessi laun en þau eru örugglega búin að missa áhugann á leikmanninum eftir framkomu hans að undanförnu. Tevez hefur líka sagt að hann sé of langt frá fjölskyldu sinni á Englandi.

Ítalía - Tevez hefur verið ítrekað orðaður við Internazionale en Inter-menn sömdu við Diego Forlán í ágúst og það er ólíklegt að þeir vilji borga öðrum framherja ofurlaun.

Spánn - Bæði Real Madrid og Barcelona, tvö langstærstu félögin á Spáni, eru vel sett með leikmenn og hafa enga þörf fyrir að fá til sín leikmann eins og Tevez.

Argentína - Tevez hefur talað sjálfur um að hann óski þess að komast heim til Argentínu en félög þar í landi ráða ekki við að borga honum þessi laun.

Miðausturlönd - Það er nóg af pening á mörgum stöðum í þessum heimshluta en þarna er engin Meistaradeild eða annar heimsklassa fótbolti spilaður.