Gerrard er klár í slaginn á ný eftir sex mánaða bið

Allar líkur eru á því að enski landsliðsmaðurinn Steven Gerrard verði í leikmannahóp Liverpool á morgun gegn Brighton í deildabikarkeppninni. Gerrard, sem er 31 árs gamall, hefur ekki spilað með Liverpool í hálft ár vegna meiðsla en hann fór í aðgerð á nára s.l. vor. Talið var að Gerrard yrði klár í slaginn strax í upphafi keppnistímabilsins en það gekk ekki eftir. 

Læknateymi Liverpool hefur ekki tekið neina áhættu með Gerrrard og hafa þeir ekki gefið honum leyfi til þess að taka þátt í leikjum liðsins fram til þessa.

Kenny Dalglish knattspyrnustjóri Liverpool vill eflaust fá hinn þaulreynda leikmann sem allra fyrst í liðið eftir 4-0 tapið gegn Tottenham um s.l. helgi í ensku úrvalsdeildinni. Óvíst er hvort Gerrard verði í byrjunarliðinu gegn Brighton en hann verður allavega í leikmannahópnum samkvæmt breskum fjölmiðlum.

Gerrard hefur ekki leikið með Liverpool frá því að liði vann Manchester United 3-1 þann 6. mars á þessu ári. Hann hefur aðeins tekið þátt í 6 af alls 29 leikjum þar sem Kenny Dalglish hefur stjórnað liðinu.