Hernandez fljótur að jafna sig eftir tæklinguna frá Cole

Javier Hernandez framherji enska meistaraliðsins Manchester United virðist hafa hrist af sér meiðslin sem hann varð fyrir í 3-1 sigri liðsins s.l. sunnudag gegn Chelsea. „Litla baunin“ eins og landsliðsmaðurinn frá Mexíkó er kallaður fékk mikið högg á vinstri fótinn þegar Ashley Cole reyndi að verjast skoti frá honum en Cole var stálheppinn slasa ekki Hernandez alvarlega í því tilviki.

Umboðsmaður Hernandez segir að meiðslin séu ekki eins alvarleg og í fyrstu og var talið. Og er búist við að Hernandez fari að æfa á ný strax á morgun, miðvikudag. Sir Alex Ferguson knattspyrnustjóri Man Utd var ekki vongóður strax eftir sigurleikinn og taldi hann að Hernandez yrði frá keppni og æfingum í 2-3 vikur í það minnsta.

Hernandez fór í ítarlega skoðun hjá læknateymi Man Utd þar sem gengið var úr skugga um að ekki hefði flísast upp úr beini eins og óttast var í fyrstu.