Villas-Boas lagði inn kvörtun vegna dómgæslunnar á Old Trafford

Andre Villas-Boas, stjóri Chelsea, var það ósáttur með dómgæsluna í leik Manchester United og Chelsea á Old Trafford að hann er búinn að leggja formlega kvörtun inn á borð Mike Riley, formanns dómaranefndar ensku úrvalsdeildarinnar.

Villas-Boas var brjálaður yfir því að fyrstu tvö mörk United í leiknum voru greinilega rangstöðumörk en United vann leikinn 3-1 eftir að hafa komist 3-0 yfir í fyrri hálfleiknum.

„Ég er mjög mjög ósáttur með slaka frammistöðu dómarans í þessum leik sem á endanum réði miklu um úrslit leiksins. Ég sætti mig ekki við þetta því maður ætlast til þess að línuvörðurinn sinni sínu starfi," sagði Andre Villas-Boas.

„Ég hef þegar farið lengra með þetta mál með því að tala við það fólk sem hefur eitthvað með þetta að segja. Við erum allir mjög vonsviknir með þá staðreynd að dómarinn réði svona miklu um úrslit leiksins," sagði Villas-Boas.

„Ég var samt mjög ánægður með það hvernig lið mitt brást við þessu mótlæti. Það héldu allir haus og enginn missti einbeitinguna," sagði Villas-Boas.