Eggert greiddi umboðsmanni Lucas Neill 165 milljónir króna

Knattspyrnuheimurinn nötrar í dag eftir að Peter Harrison, fyrrum umboðsmaður Eiðs Smára Guðjohnsen og fleiri leikmanna, gaf það út að hann ætli sér að opinbera allan skítinn sem á sér stað í knattspyrnuheiminum. Hann er þegar byrjaður að kjafta frá.

Harrison segist ætla að fletta ofan af tveimur nafntoguðum knattspyrnustjórum í enska boltanum og óttast ekki þó svo hann hafi fengið hótanir úr undirheimunum.

Umbinn segir líka frá ótrúlegasta samningi sem hann hefur gert. Þá fékk Harrison 900 þúsund pund eða 165 milljónir króna á einum degi er hann samdi við Eggert Magnússon, þáverandi stjórnarformann West Ham.

Harrison hætti sem umboðsmaður eftir að dómstóll enska knattspyrnusambandsins dæmdi gegn honum í máli Andy Carroll. Harrison var lengi umboðsmaður Carroll og taldi sig eiga fá eitthvað í sinn hlut er Carroll fór til Liverpool en hann hafði þá nýskipt um umboðsmann. Harrison fékk ekki krónu þó svo Carroll hefði enn verið samningsbundinn honum.

Það vekur nokkra athygli að Harrison segist hafa notfært sér hversu einfaldur Eggert Magnússon var er hann kom Lucas Neill til West Ham. Þá fékk Harrison 900 þúsund pund í sinn hlut.

"Hlutur umboðsmannsins er eins hár og samið er um. Ég fékk 900 þúsund er Lucas Neill fór til West Ham í staðinn fyrir að fara til Liverpool. Neill fékk líka 72 þúsund pund í vikulaun hjá félaginu. Hann ætlaði sér að fara til Liverpool en West Ham hlustaði ekki á slíkt," sagði Harrison.

"Þetta var ótrúlegt. Mér fannst þetta bara vera viðskipti á þessum tíma. Ég þurfti líka að borga reikninga eins og aðrir. Í dag skammast ég mín fyrir þennan samning."

Harrison viðurkennir að hafa gert ýmislegt vafasamt á sínum ferli og meðal annars mútað ungum leikmönnum með dýrum gjöfum svo þeir skrifuðu undir samning hjá sér.

Eins og áður segir ætlar Harrison að fletta ofan af tveimur stjórum sem hann segir að taki sneið af kökunni er leikmenn eru seldir.

Harrison talar um margt annað í þessu áhugaverða viðtali sem birtist í Daily Mail. Hægt er að sjá greinina í heild sinni hér.