Steve Clarke um byrjun Liverpool: Við fáum sjö af tíu mögulegum

Steve Clarke, þjálfari aðalliðs Liverpool og aðstoðarmaður Kenny Dalglish, hefur tjáð sig um byrjun Liverpool-liðsins sem hefur fengið 10 stig af 18 mögulegum og er búið að tapa fyrir bæði Stoke og Tottenham. Liverpool er nú með aðeins fjórum stigum meira en í fyrra þegar mikil óánægja var þegar farin að gerjast með þáverandi stjóra Roy Hodgson sem var síðan rekinn í janúar.

„Það er engin þörf á því að missa sig yfir þessu eða vera eitthvað of vonsvikinn með þessa meðalbyrjun. Við erum líklega að horfa upp á einkunn upp á sjö af tíu mögulegum. Við höfum spilað stundum vel en stundum líka illa en það er skiljanlegt hjá liði sem er að taka svona marga nýja leikmenn inn," sagði Steve Clarke.

Steve Clarke tjáði sig líka um Luis Suarez og fyrirliðann Steven Gerrard. Sá fyrrnefndi var ekkert alltof sáttur með að vera skipt útaf um helgina og Gerrard spilaði þá sínar fyrstu mínútur í ensku úrvalsdeildinni eftir meiðslin.

„Það eru margir góðir leikmenn í þessari deild en þeir allra bestu hafa rétta hugarfarið fram yfir hina. Luis er einn af þeim og hann elskar að spila fótbolta og er alveg eins og á æfingum og í leikjum," sagði Clarke og er greinilega yfir sig hrifinn af kappsemi Suarez sem hann segir skína í gegn. Gerrard kom inn á fyrir Suarez undir lok leiksins um helgina.

„Steven mun ráða því sjálfur hversu fljótt hann kemur inn í þetta að fullu með því hvernig hann stendur sig á æfingunum. Við erum ánægðir með það hvar hann er staddur núna. Við hefðum kannski getað komið með hann aðeins fyrr inn á móti Wolves en það þróaðist ekki þannig. Núna fær hann heila viku í viðbót og við getum látið hann taka á því á æfingunum," sagði Clarke.