Gomes mun yfirgefa Tottenham í janúar

Brasilíski markvörðurinn Heurelho Gomes mun að öllum líkindum yfirgefa Tottenham þegar félagsskiptaglugginn opnar á ný í janúar.

Harry Redknapp, knattspyrnustjóri Tottenham, hefur gefið til kynna í enskum fjölmiðlum að markvörðurinn eigi sér ekki framtíð hjá Lundúnarliðinu.

Brad Friedel gekk í raðir Tottenham í sumar frá Aston Villa og hann hefur verið á milli stanganna í leikjum liðsins á tímabilinu. Það sem vekur einnig athygli er að Gomes hefur ekki einu sinni komist í leikmannahópinn hjá félaginu.

„Hann er ekki ánægður með sína stöðu hjá félaginu og hefur tilkynnt mér að hann ætli sér að yfirgefa Tottenham í janúar ef ekkert breytist,“ sagði Redknapp við fjölmiðla ytra.