Gerrard: Suarez verður goðsögn hjá Liverpool

Steven Gerrard, fyrirliði Liverpool, er þess fullviss að Úrúgvæinn Luis Suarez verði orðinn að goðsögn hjá félaginu áður en langt um líður.

Suarez kom til Liverpool í janúar síðastliðnum og hefur látið mikið til sín taka. Hann átti góðan leik með Liverpool sem tapaði að vísu fyrir Stoke um helgina, 1-0.

„Vonandi verður hann hérna sem lengst því hann mun hafa mikilvægu hlutverki að gegna í framtíð félagsins,“ sagði Gerrard við enska fjölmiðla en hann er nú nýbyrjaður að æfa á ný eftir meiðsli.

„Hann er enn ungur og ég er viss um að hann muni halda áfram að bæta sig á næstu árum. Það er fremur ógnvænleg hugsun en hann vill læra meira og bæta sig.“

„Hann er mjög áhugasamur knattspyrnumaður og afar klókur. Hann getur ekki beðið eftir næstu æfingu og er eins og krakki að því leyti.“

„Hann og Dirk (Kuyt) hafa verið eins og tvær Duracell-kanínur að undanförnu. Þeir hætta bara ekki og það hlýtur að vera algjör martröð fyrir varnarmenn andstæðingsins.“