Niall Quinn útilokar ekki að fá Gyan aftur

Asamoah Gyan, Ganverjinn sem var nýlega lánaður til félags í Sameinuðu arabísku furstadæmunum, gæti vel spilað með Sunderland á nýjan leik.

Þetta segir Niall Quinn, stjórnarformaður Sunderland. Málið er allt hið furðulegasta en ljóst að Gyan var orðinn afar ósáttur við Steve Bruce, stjóra Sunderland, hafi því viljað fara frá félaginu svo mánuðum skiptir.

Nú segir Quinn að þeir Gyan og Bruce hafi náð sáttum á ný. „En Asamoah verður þó að sannfæra Steve og alla stuðningsmenn Sunderland að hann vilji í gefa sig allan til félagsins ef hann ætlar sér að koma aftur,“ sagði Quinn við enska fjölmiðla.

Quinn segir að ákvörðun Gyan um að ganga til liðs við Al-Ain í Sameinuðu arabíska furstadæmunum afar einkennilega.

„Okkur öllum fannst hún afar einkennileg. En ég ákvað að það væri hagsmunum félasgins fyrir bestu að samþykkja þennan samning,“ sagði Quinn.

Sjálfur segir Gyan að hann sé ánægður hjá sínu nýja félagi. „Al-Ain er mikilvægt félag og þetta er stór og mikil áskorun fyrir mig,“ sagði hann en vildi ekkert segja um hvað gerist eftir að tímabilinu lýkur og lánssamningurinn rennur út.