Agger: Erum margfalt betri en í fyrra

Daniel Agger, varnarmaður Liverpool, segir að liðið hafi stórbætt sig frá síðasta tímabili og fagnar því að félagið hafi keypt svo marga leikmenn á árinu.

Liverpool átti skelfilegu gengi að fagna í upphafi síðustu leiktíðar og var í neðri hluta deildarinnar lengi vel. Skipt var um eigendur í október og Roy Hodgson svo rekinn um áramótin. Kenny Dalglish tók við og kom liðin upp í sjötta sæti deildarinnar.

„Ég held að það sé margt sem hjálpar til en þjálfarateymið hefur haft mikilvægu hlutverki að gegna,“ sagði Agger. „Það þarf svo bara að líta á leikmannahópinn eins og hann lítur út í dag. Hann er virkilega öflugur.“

„Við höfum nú trú á því að við getum staðið okkur vel og unnið marga leiki. Það er stór breyting frá því í fyrra.“