Andri missir af leiknum gegn KR - tímabilið í hættu

Andri Ólafsson, fyrirliði ÍBV, verður ekki með sínum mönnum gegn KR um helgina en hann meiddist í nára í leik liðsins gegn Stjörnunni í Garðabænum í gær.

ÍBV og KR eru jöfn að stigum á toppi Pepsi-deildar karla en Eyjamenn þurfa helst á sigri að halda þar sem að KR-ingar eiga leik til góða. En þeir verða að vera án fyrirliða síns í leiknum.

Andri segir enn óvíst hversu alvarleg meiðslin eru en svo gæti vel farið að hann spili ekki meira á tímabilinu.

„Þetta lítur ekki allt of vel út en það eina sem er pottþétt í augnablikinu er að ég verð ekki með á sunnudaginn,“ sagði Andri í samtali við Vísi í dag.

Andri verður að fara til Reykjavíkur til að láta rannsaka meiðslin nákvæmlega en hann ætlar að sjá til hvernig næstu dagar þróast hjá sér.

„Ég verð hjá sjúkraþjálfara um helgina og ef þetta skánar ekki verð ég að fara til í myndatöku til að fá úr þessu skorið.“

„Ég ætlaði að spyrna mér í burtu þegar ég fann allt í einu fyrir hörkusmelli í náranum. Annað hvort er þetta alvarleg tognun eða það hefur eitthvað slitnað í vöðvanum. Ef það er raunin verð ég allan veturinn að jafna mig.“

Hann segir að þetta sé svekkjandi, sérstkalega í ljósi þess að lítið er eftir af tímabilinu og ÍBV í bullandi baráttu um Íslandsmeistaratitilinn.

„Allir skemmtilegustu leikirnir eru eftir og þetta er vissulega svekkjandi. En það þýðir ekkert að gráta þetta í langan tíma.“