Bendtner: Ekki erfið ákvörðun að yfirgefa Arsenal

Daninn Nicklas Bendnter segir að það hafi verið auðveld ákvörðun að yfirgefa herbúðir Arsenal þar sem hann fékk lítið að spila hjá Lundúnaliðinu.

Bendtner er nú í herbúðum Sunderland þar sem hann verður í láni út þessa leiktíð. Þetta er í annað sinn sem Arsenal lánar leikmanninn en hann fór á sínum tíma til Birmingham.

"Ég var inn og út úr liðinu hjá Arsenal. Ég fékk ekki að spila eins mikið og ég þarf. Þess vegna var ákvörðunin auðveld," sagði Bendtner.

"Ég vil verða betri fótboltamaður og ná þeim markmiðum sem ég hef sett mér. Ég var ekki að ná þeim hjá Arsenal og þess vegna var best að fara.

"Ég vil spila aftur í Meistaradeildinni. Þeir sem hafa prófað það vita hversu stórt það er að taka þátt í keppninni. Nú þarf ég að horfa eitt ár í einu fram í tímann og svo sjáum við hvað setur."