Tottenham valtaði yfir níu Liverpool-menn

Tottenham bar sigur úr býtum gegn Liverpool 4-0 í ensku úrvalsdeildinni í dag en leikurinn fór fram á White Hart Lane, heimavelli Tottenham.

Luka Modric kom heimamönnum yfir eftir aðeins sjö mínútna leik með frábæru skot fyrir utan teig sem Pepe Reina, markvörður Liverpool, átti ekki möguleika í.

Tottenham sótti án afláts næstu mínútur og höfðu hæglega getað skorað fleiri mörk í fyrri hálfleiknum.

Á 18. mínútu náði Luis Suarez að skora mark sem var dæmt af vegna rangstöðu og það réttilega.

Þetta var ekki alveg dagurinn hans Charlie Adam, leikmaður Liverpool, en hann fékk sitt annað gula spjald eftir hálftíma leik og því rekinn af velli. Staðan var 1-0 í hálfleik.

Seinni hálfleikurinn byrjaði ekki vel fyrir gestina frá Bítlaborginni, en Skrtel fékk sitt annað gula spjald í leiknum á 63. mínútu og því lék Liverpool níu gegn ellefu út leiktímann.

Aðeins einni mínútu síðar slapp Jermaine Defoe einn í gegn um vörn Liverpool og setti boltann laglega framhjá Reina í markinu.

Emmanuel Adebayor skoraði þriðja mark Tottenham stuttu seinna og staðan því orðin 3-0. Adebayor var aftur á ferðinni á 93. mínútu þegar hann þrumaði boltanum í netið af stuttu færi og innsiglaði öruggan sigur, 4-0, á Liverpool.

Staðan í ensku úrvalsdeildinni