Manchester United með fullt hús stiga eftir sigur á Chelsea

Manchester United eru óstöðvandi í ensku úrvalsdeildinni þessa daganna og hafa unnið alla leikina á tímabilinu, en í dag varð Chelsea fyrir barðinu á United.

Manchester United sigraði Chelsea 3-1 á Old Trafford og er sem fyrr á toppi deildarinnar.

Cris Smalling kom heimamönnum yfir með marki á 8. mínútu leiksins, en Smalling skallaði boltann í netið eftir aukaspyrnu frá Ashley Young.

Luis Nani skoraði síðan stórkostlegt mark á 37. mínútu með skoti lengst utan af velli, alveg óverjandi fyrir Peter Cech í marki Chelsea.

Wayne Rooney skoraði síðan þriðja mark Manchester United rétt fyrir lok fyrri hálfleiks, en skelfileg varnarmistök voru þess valdandi að Rooney fékk boltann einn fyrir framan markið og setti knöttinn auðveldlega í netið.

Spánverjinn Fernando Torres komst loksins á blað fyrir Chelsea á tímabilinu þegar hann náði að minnka muninn fyrir gestina í upphafi síðari hálfleiks. Torres fékk frábæra stungusendingu inn fyrir vörn Manchester United og lyfti boltanum fyrir David de Gea í marki United.

Á 83. mínútu fékk Fernando Torres algjört dauðafæri en hann komst einn í gegn og aðeins autt markið beið hans. Torres náði á einhvern óskiljanlegan hátt að skjóta framhjá og mun varla sofa lengi í nótt.

Man. Utd. sigraði því leikinn 3-1 og eru enn ósigraðir í ensku úrvalsdeildinni á tímabilinu, en liðið hefur skorað 21 mark og fengið aðeins á sig fjögur.

Staðan í ensku úrvalsdeildinni