Redknapp sér enn eftir Suarez

Harry Redknapp, stjóri Tottenham, segist enn sjá eftir því að hafa mistekist að festa kaup á Luis Suarez áður en sá síðarnefndi gekk í raðir Liverpool fyrr á þessu ári.

„Við skoðuðum Suarez,“ sagði Redknapp en Tottenham mætir einmitt Suarez og félögum í Liverpool í dag.

„Það er leikmaður sem við hefðum sennilega átt að taka, eftir á að hyggja. Kaupverðið var þó um 30 milljónir punda og er það mikill peningur. við vorum þar að auki með Rafael van der Vaart fyrir og töldum við að þeir væru nokkið líkir leikmenn.“

„Við vildum fá sóknarmann sem gæti spilað einn í fremstu víglínu. En ég hef auðvitað séð núna að hann getur leyst þá stöðu mjög vel. Hann getur gert hvað sem hann vill. Hann er frábær leikmaður - í hæsta gæðaflokki.“