Mancini: Carlos verður að bíða eftir sínu tækifæri

Roberto Mancini, stjóri City, segir að það séu leikmenn hjá félaginu sem eru betri en Carlos Tevez eins og málin standi nú.

Eins og frægt er orðið vildi Tevez losna frá félaginu nú í sumar og sagðist vera afar óhamingjusamur í Manchester. Ekki tókst að finna kaupanda og því er hann enn hjá City.

Tevez hefur lítið fengið að spila en var þó í byrjunarliði City gegn Wigan um síðustu helgi. Hann var þó settur aftur á bekkinn fyrir leikinn gegn Napoli í Meistaradeild Evrópu í vikunni.

„Það eru betri leikmenn en Carlos hjá félaginu eins og málin standa nú,“ sagði Mancini við enska fjölmiðla. „Carlos mun fá sín tækifæri. Ég veit ekki hvort hann er ánægður með stöðu mála en það geta ekki allir verið ánægðir. Það er bara eðlilegt.“

Framherjarnir Edin Dzeko og Sergio Agüero hafa verið sjóðheitir í upphafi tímabilsins og báðir skorað sex mörk til þessa. Þá er Mario Balotelli einnig að bíða færis en hann hefur bara komið við sögu í einum deildarleik til þessa.