Sif: Kom á óvart hversu litla mótspyrnu við fengum

Sif Atladóttir segir að það hafi aldrei verið nein örvænting í varnarleik íslenska landsliðsins þrátt fyrir að það hafi aðeins legið á vörninni í seinni hálfleik gegn Noregi í dag.

Ísland vann 3-1 sigur með frábærri frammistöðu í fyrri hálfleik þar sem Ísland skoraði þrjú glæsileg mörk. Norðmenn voru sterkari aðilinn í seinni hálfleik en náðu í raun aldrei að ógna forystu Íslands að nokkru ráði.

„Við lögðum upp með það fyrir leikinn að setja pressu á þær og láta markvörðinn vera óörugga í markinu,“ sagði Sif eftir leikinn. „Og það gekk fullkomnlega upp.“

„Það kom okkur svolítið á óvart hversu lítið það reyndi á okkur í fyrri hálfleik en ég held að við höfum náð að loka vel á þeirra sterkustu leikmenn. Þær vilja helst vera mikið með boltann og dunda sér með hann en það tókst þeim ekki.“

Norðmenn náði þó betri tökum í leiknum í seinni hálfleik en Sif sagði varnarmenn Íslands ekki hafa örvæntað.

„Við erum orðnar svo sjóaðar þarna aftast og við reyndum fyrst og fremst að loka fyrir sendingar inn í teig. Ég er bara ótrúlega stolt af stelpunum - þetta var yndislegur dagur.“