Uppgötva plánetu þar sem sólarlagið er tvöfalt

Geimvísindamenn NASA hafa uppgötvað plánetu sem gengur á sporbaug í kring um tvær sólir. Möguleikinn á því að líf þrífist á þess háttar plánetum er töluvert meiri en á þeim sem snúast aðeins kring um eina sól.

Tilvera veraldar þar sem sólarlagið er tvöfalt, eins og á plánetunni Tatooine úr Star Wars, er nú vísindaleg staðreynd. Plánetan sem um ræðir nefnist Kepler-16b og er í 200 ljósára fjarlægð frá jörð. Öfugt við eyðimerkurveröld Tatooine er plánetan köld, yfirborðið gaskennt og nær óhugsandi að þar þrífist lífverur.

Vísindamenn hafa lengi haft óljósan grun um tilvist pláneta sem snúast um tvær sólir. Þessi tímamóta uppgötvun staðfestir þá kenningu og þó lífsskilyrði séu ekki hagstæð á þessari tilteknu plánetu telja vísindamenn að á plánetum sem hringsóla um tvær sólir séu almennt meiri líkur á að líf finnist.

Það voru vísindamenn Kepler verkefnis Geimferðastofnunar Bandaríkjanna sem fundu plánetuna. Kepler verkefnið miðar að því að fínkemba Vetrarbrautina í kring um okkur með hjálp öflugra sjónauka í leit að plánetum sem líkjast jörðinni. Markmiðið er að finna hnetti innan lífbeltis fjarlægra sóla þar sem líf gæti þrifist.

Þessar uppgötvanir voru birtar á föstudaginn var í vísindablaðinu Science.