Solksjær er ekki á förum frá Molde til Blackburn

Ole Gunnar Solskjær, fyrrum leikmaður Manchester United, hefur verið orðaður við knattspyrnustjórastöðuna hjá Blackburn. Solskjær er á sínu fyrsta ári sem þjálfari norska úrvalsdeildarliðsins Molde og forráðamenn liðsins vísa því á bug að Solskjær sé á förum enda situr Molde í efsta sæti deildarinnar og stefnir hraðbyri að meistaratitlinum.

Molde er með sex stiga forskot þegar sjö leikir eru eftir af deildarkeppninni.

Svo virðist sem að Steve Kean knattspyrnustjóri Blackburn fái starfsfrið allavega fram að næsta leik eftir 4-3 sigur liðsins gegn Arsenal um helgina. Kean virðist ekki njóta trausts hjá stuðningsmönnum liðsins og flestir veðbankar telja að hann verði rekinn áður en langt um líður.

Talsmaður Molde segir í viðtali við enska fjölmiðla að Solskjær sé samningsbundinn í 2 ½ ár til viðbótar og hann sé ekki á förum frá Noregi. Solskjær náði góðum árangri sem þjálfari varaliðs Manchester United áður en hann flutti á æskuslóðir sínar í Molde í janúar á þessu ári.