Hargreaves gæti spilað með City í vikunni

Roberto Mancini, stjóri Manchester City, segir mögulegt að Owen Hargreaves muni spila sinn fyrsta leik fyrir félagið þegar liðið mætir Birmingham í enska deildabikarnum á miðvikudaginn.

Það kom mörgum á óvart þegar að Hargreaves, fyrrum leikmaður Manchester United, samdi við City í lok síðasta mánaðar en þá var hann án félags.

Líklegt er að Hargreaves muni byrja á bekknum en Mancini sér fyrir sér að hann gæti komið við sögu að einhverju leyti.

„Hann hefur verið að æfa á fullu en er enn ekki orðinn 100 prósent tilbúinn,“ sagði Mancini við enska fjölmiðla. „Hann gæti mögulega spilað í 30 til 45 mínútur.“

„Ég þarf þó að ræða við Owen fyrst og við munum ákveða á morgun hvort hann spili. En mér finnst það mjög líklegt.“

Hann segir líklegt að hann muni breyta liðinu sínu nokkuð mikið fyrir leikinn. „Það eru fimm eða sex leikmenn sem ég þarf að hvíla. Við viljum komst áfram en það eru leikmenn sem þurfa sína hvíld.“