Nýju skórnir hans Rooney fengu ekki góða auglýsingu um helgina

Wayne Rooney hjá Manchester United, er markahæsti leikmaður ensku úrvalsdeildarinnar með níu mörk í fyrstu fimm umferðunum og hefur þar með sett nýtt met í markaskorun í upphafi móts í ensku úrvalsdeildinni. Rooney hefði samt auðveldlega getað verið búinn að skora tíu mörk því hann klúðraði víti á eftirminnilegan hátt í sigrinum á Chelsea í gær.

Það var hinsvegar hvernig hann klúðraði vítinu sem vakti mesta athygli ekki síst þar sem að hann er nýbúinn að setja á markað nýja skó sem reyndust síðan ekki betur en þetta þegar hann frumsýndi þá á stóra sviðinu.

Rooney rann hreinlega á hausinn þegar hann ætlaði að taka vítið sem varð þess valdandi að hann skaut boltanum í stöðufótinn og þaðan fór boltinn langt framhjá markinu. Sem betur fer fyrir Rooney var staðan 3-1 í leiknum og þetta klúður hans réð því ekki úrslitunum.

Skórnir bera nafnið T90 og slagorðið er The Perfect Strike eða fullkomna spyrnan. Það er hægt að sjá auglýsingu um nýju skóna frá Nike með því að smella á myndbandið hér fyrir ofan þar sem er farið ítarlega í kosti nýju skónna sem eiga að vera sérhannaðir til að koma boltanum óverjandi í mark andstæðinganna.

Rooney skoraði reyndar eitt mark í leiknum í nýju skónum og skórnir eru því kannski ekki alslæmir þótt þeir virki bara illa í vítaspyrnum.

Hér fyrir neðan má sjá myndasyrpu frá Getty Images og AP frá því þegar Wayne Rooney rann á rassinn þegar hann ætlaði að taka vítaspyrnuna í gær. Hægt er að sjá myndirnar stærri með því að smella á þær.