Skallinn úr sögunni?

Þeir sem eru byrjaðir að fá há kollvik ættu ekki að örvænta því samkvæmt nýrri rannsókn er búið að finna lausnina við hármissi.

Vísindamenn við Yale-háskólann í Bandaríkjunum telja sig vera búna að finna lausnina við hármissi - sem hefur plagað margan manninn í gegnum tíðina. Þeir segjast hafa fundið út hvaða fitufrumur það eru sem valda því að óvirkar hárfrumur lifna aftur við.

Þegar hárfrumur deyja skreppur fitulagið í hársverðinum saman en stofnfrumurnar lifa áfram. Lausn vísindamannanna felst í því að hægt verði að lífga stofnfrumurnar við með því að sprauta fitufrumunum inn í þær.

Niðurstöður rannsóknarinnar voru birtar í tímaritinu Cell. Prófessor í líffræði við Kaupmannahafnarháskóla segist vera mjög spenntur yfir niðurstöðunum en varar þó við því að lausnin sé fundin - þetta sé einungis á rannsóknarstigi.

Aðferðin hefur þegar verið prófuð á músum með góðum árangri. En hvort að það skipti máli í þessu tilviki, að vera maður eða mús, verður að koma í ljós.