Nasri: Arsenal er ekki samkeppnishæft í efri hlutanum

Samir Nasri, leikmaður Manchester City, heldur áfram að tjá sig um sitt fyrrum félag, Arsenal, en leikmaðurinn sagði í viðtalið við fréttastofu Sky Sports að Arsenal gæti ekki keppt við stóru liðin í ár.

Nasri gekk til liðs við Man. City á dögunum og hóf dvöl sína hjá Manchester-liðinu með miklum látum en hann lagði upp þrjú mörk í sínum fyrsta leik gegn Tottenham um helgina.

Franski landsliðsmaðurinn sagði að þetta hefði verið rétti tímapunkturinn til að yfirgefa félagið.

„Þetta var hárréttur tímapunktur fyrir mig til að fara frá Arsenal, en það voru ákveðin merki um að liðið væri á niðurleið,“ sagði Nasri.

„Brotthvarf Fabregas til Barcelona var merki um að félagið yrði ekki samkeppnishæft í efri hluta deildarinnar og því ákvað ég að fara“.

„Arsenal hefur ekki yfir eins miklum fjármunum að ráða og hinir stóru klúbbarnir, það er ekki Arsene Wenger að kenna heldur hvernig klúbburinn er rekinn“.

„Umboðsmaður minn vann mikla vinnu þegar ég fór frá klúbbnum yfir til Manchester City. Þegar um svona stór félagskipti er að ræða þá verður maður að vera þolinmóður. Ég er einnig glaður með að Arsenal fékk væna summu fyrir mig“.