Joe Cole lánaður til Lille út tímabilið

Joe Cole, leikmaður Liverpool, hefur verið lánaður til frönsku meistaranna Lille út keppnistímabilið. Þetta kemur fram á heimasíðu Liverpool.

Óhætt er að segja að Cole hafi átt erfitt uppdráttar hjá Liverpool undanfarið ár. Hann var rekinn útaf í sínum fyrsta deildarleik með félaginu gegn Arsenal á Anfield sem gaf tóninn fyrir tímabil sem hann vill eflaust gleyma sem fyrst.

Ekki er vitað um ákvæði lánssamnings Cole við Lille. Fastlega má reikna með því að franska liðið greiði hluta af vikulaunum Cole hjá Liverpool sem nema 90 þúsund pundum eða um 17 milljónum íslenskra króna.

Aston Villa var talið á höttunum eftir Cole en nú er staðfest að enski landsliðsmaðurinn spilar í Frakklandi út leiktíðina.