Parker nær fyrstur Lundúna-þrennunni Chelsea-West Ham-Tottenham

Scott Parker samdi við Tottenham í dag og verður því fyrsti leikmaðurinn í sögunni til þess að spila fyrir Lundúnaliðin Chelsea, West Ham og Tottenham. Þetta hefur Infostrada Sports tekið saman og birt á twitter-síðu sinni.

Parker sem er orðinn 30 ára gamall sóttist eftir því að spila í ensku úrvalsdeildinni eftir að West Ham féll úr deildinni í vor. Hann varð síðan að ósk sinni þegart Harry Redknapp vildi endilega fá hann til Tottenham.

Scott Parker, sem er fæddur í London, hefur leikið fyrir eitt Lundúnalið til viðbótar því hann hóf ferill sinn hjá Charlton Athletic og lék þar frá 1997 til 2004.

Chelsea keypti Parker á tíu milljónir punda árið 2004 og þar lék hann 15 leiki tímabilið 2004-2005 áður en Chelsea seldi hann til Newcastle.

West Ham keypti Parker frá Newcastle fyrir 7 milljónir í júní 2007 og þar lék hann 113 deildarleiki frá 2007 til 2011.