Búlgarir hafa ekki mikinn áhuga á enska landsliðinu

Það er greinilega ekki mikill áhugi á enska landsliðinu í Búlgaríu þessa dagana því búlgarska knattspyrnusambandinu gengur afar illa að selja miða á leik Búlgaríu og Englands sem fer fram á Vasil Levski leikvanginum í Sofíu á föstudagskvöldið.

Það hafa selst minna en 15 þúsund miðar á leikinn en Vasil Levski völlurinn tekur 43.600 manns í sæti. Forráðamenn búlgarska sambandsins hafa reynt að auka söluna með því að hafa miða til sölu á bensínsstöðvum undanfarnar þrjár vikur en það hefur ekki breytt miklu.

Það hefur lítið gengið hjá búlgarska landsliðinu eins og því íslenska en það hefði samt örugglega verið hægt að fylla Laugardalsvöllinn tvisvar eða jafnvel þrisvar væri enska landsliðið að mæta til Reykjavíkur eftir tvo daga.

„Landsliðið okkar á kannski aðeins pínulítinn möguleika á því að komast á EM en það kemur mér samt á óvart hversu fáir miðar seljast því það eru svo margir áhugamenn um enska boltann í Búlgaríu," sagði hinn 24 ára Kristian Georgiev við blaðamann Reuters þegar hann var að fara að kaupa sér miða á leikinn.

Búlgarir hafa ekki komist á stórmót síðan á EM 2004 en þeir eru í 4. sæti í G-riðli með fimm stig úr fimm leikjum. England og Svartfjallaland eru á toppi riðilsins með sex stigum meira og Sviss er með jafnmörg stig en betri markatölu.