Mertesacker og Santos til Arsenal

Arsenal hefur gengið frá kaupum á varnarmönnunum Per Mertesacker frá Werder Bremen og Andre Santos frá Fenerbahce.

Arsene Wenger, knattspyrnustjóri Arsenal, ætlar greinilega að styrkja hóp sinn fyrir lokun félagaskiptagluggans í kvöld. Ljóst var fyrr í dag að leikmennirnir væru við það að ganga frá samningum við Lundúnarfélagið og nú hefur verið skrifað undir.

Mertesacker er 26 ára miðvörður sem hefur spilað 75 landsleiki fyrir Þýskaland. Hann var í landsliði Þýskalands sem komst í undanúrslit á HM 2006 og 2010. Þá hefur hann mikla reynslu úr Evrópukeppnum með Werder Bremen.

Mertesacker heldur úti heimasíðu af dýrari gerðinni. Sjá hér.

Santos er 28 ára vinstri bakvörður sem þykir sókndjarfur og með góða tækni. Hann hefur spilað 22 landsleiki fyrir Brasilíu.

Þá gekk Arsenal í gær frá kaupum á framherjanum Park Chu-Young frá AS Monaco. Suður-Kóreumaðurinn samdi til ársins 2013. Þá þarf hann að snúa til heimalandsins og uppfylla herskyldu sína.