Owen Hargreaves fær eins árs samning hjá Manchester City

Owen Hargreaves er búinn að ganga frá eins árs samning við Manchester City en hann kemur til félagsins á frjálsri sölu frá nágrönnunum í Manchester United. Hargreaves var látinn fara frá United eftir að hafa verið meira eða minna meiddur í fjögur ár á Old Trafford.

Hargreaves mætir á sína fyrstu æfingu með Manchester City á morgun en það kom mörgum mikið á óvart þegar Roberto Mancini vildi gera samning við hann. Hargreaves spilaðí aðeins fjóra leiki með United á síðustu þremur árum en hann var enskur landsliðsmaður áður en hann meiddist.

Owen Hargreaves hefur mikla reynslu en hann vann Meistaradeildina með Bayern Munchen árið 2001 og svo aftur með Manchester United sjö árum seinna. Hann hefur einu sinni orðið enskur meistari og vann þýska titilinn fjórum sinnum á árunum 2001 til 2006.