Bellamy fer til Liverpool og Benayoun kominn á láni til Arsenal

Craig Bellamy er kominn aftur til Liverpool en Yossi Benayoun valdi það að fara frekar til Arsenal í staðinn fyrir að fara aftur norður til Liverpool. Portúgalinn Raul Meireles hefur einnig óskað formlega eftir félagsskiptum frá Liverpool og er líklega á leiðinni til Chelsea.

Það er nóg að gerast á síðustu mínútunum áður en félagskiptaglugganum lokar nú á miðnætti. Hinn 32 ára gamli  Craig Bellamy er kominn aftur á Anfield eftir að hafa samið á ný við Liverpool. Bellamy hafði fengið sig lausan frá Manchester City en hann fór frá Liverpool til West Ham árið 2007.

Yossi Benayoun tilkynnti það líka á twitter-síðu sinni að hann færi til Arsenal á láni frá Chelsea en Arsenal er einnig að elta Everton-manninn Mikel Arteta á lokasprettinum. Arsene Wenger, stjóri Arsenal, hafði fyrr í dag gengið frá kaupum á varnarmönnunum Andre Santos og Per Mertesacker.