Kasper Schmeichel fékk tvö gul spjöld fyrir að tefja

Kasper Schmeichel, sonur Peter Schmeichel og markvörður Leicester, fór illa að ráði sínu í 2-2 jafntefli Leicester á móti Nottingham Forest í ensku b-deildinni í gær. Hann fékk nefnilega tvö gul spjöld fyrir að tefja leikinn og það á sömu mínútunni.

Leicester komst í 2-0 í leiknum með mörkum David Nugent og Gelson Fernandes í fyrri hálfleik en atvikið með Kasper Schmeichel gerðist þegar Nottingham Forest fékk dæmt víti á 79.mínútu.

Schmeichel fékk fyrra spjaldið fyrir að tefja framkvæmd vítaspyrnunnar en það seinna fyrir að sparka boltanum upp í stúku í bræðiskasti eftir að Lewis McGugan hafði skorað úr vítaspyrnunni.

George Boateng tryggði Nottingham Forest síðan 2-2 jafntefli með marki á fjórðu mínútu í uppbótartíma en Chris Weale var þá í marki Leicester.

Sven-Göran Eriksson, stjóri Leicester, furðaði sig yfir ákvörðun dómarans eftir leikinn en það er ekki oft sem markverðir frá tvö spjöld með mínútu millibili fyrir að tefja leikinn.