Leonardo: Berbatov ekki til sölu

Brasilíumaðurinn Leonardo, yfirmaður knattspyrnumála hjá Paris Saint Germain, segir Dimitar Berbatov, leikmann Manchester United, ekki til sölu. Það hafi hann fengið að heyra í símtali en á hinum enda línunnar var Sir Alex Ferguson, knattspyrnustjóri United.

PSG vann sinn fyrsta leik í frönsku deildinni í kvöld þegar liðið lagði Valenciennes á heimavelli 2-1. Félagið hefur verið iðið við kolann á leikmannamarkaðnum undanfarnar vikur og var Leonardo spurður út í möguleg kaup á Dimitar Berbatov að leiknum loknum.

„Ég spjallaði við Ferguson í síma og hann sagðist treysta á Berbatov, hann væri ekki til sölu," sagði Leonardo við France Football.

Berbatov, markahæsti leikmaður ensku úrvalsdeildarinnar á síðustu leiktíð, hefur verið orðaður við brotthvarf frá félaginu. Hann virðist hafa færst enn aftar í goggunarröðinni hjá United en Englendingurinn Danny Welbeck hefur spilað fleiri mínútur en Búlgarinn í undanförnum leikjum.

PSG hefur valdið vonbrigðum í upphafi tímabils sérstaklega í ljósi fjölmargra nýrra leikmanna. Nýjasta stjarnan, Argentínumaðurinn Javier Pastore, spilaði síðasta hálftímann fyrir PSG í kvöld en þetta var fyrsti leikur kappans í búningi Parísarliðsins.