Fogh segir að stjórn Gaddafis sé að falli komin

Forsvarsmenn Atlantshafsbandalagsins segja að ríkisstjórn Moammars Gaddafis, leiðtoga Líbíu, sé að falli komin. Nú sé kominn tími til þess að mynda nýja lýðræðislega stjórn í Líbíu. Uppreisnarmenn eru komnir inn í Trípólí, höfuðborg Líbíu, og virðist sem viðspyrnan gegn þeim sé mjög lítil.

Anders Fogh Rasmussen, framkvæmdastjóri Atlantshafsbandalagsins, sagði í yfirlýsingu sem hann sendi frá sér seint í kvöld að því fyrr sem Gaddafí gerði sér grein fyrir því að hann gæti ekki unnið baráttuna gegn eigin fólki, því betra.

Almenningur í Líbíu hefur þjást svakalega undir stjórn Gaddafís í meira en fjóra áratugi. Nú eiga þeir möguleika á nýju upphafi,” sagði Fogh í yfirlýsingu sinni.

Hann segir að Atlantshafsbandalagið muni halda áfram að fylgjast með herjum Gaddafis og muni varpa sprengju á þá ef þeir ógna líbískum almenningi.

Sky fréttastofan segir að von sé á yfirlýsingu frá Obama, forseta Bandaríkjanna, um leið og hann gerir sér grein fyrir því hver staðan er nákvæmlega í Trípólí.