Mikil sprenging í húsnæði Sameinuðu þjóðanna

Sprenging varð í byggingu Sameinuðu þjóðanna í borginni Abuja í Nígeríu í morgun. Fréttamaður BBC fréttastöðvarinnar heyrði hátt sprengihljóð og lögregluþyrla sveimar nú yfir bygginguna. Talsmaður Sameinuðu þjóðanna segir að sprengingin hafi orðið vegna sprengju sem sprakk í húsinu. Töluverðan reyk leggur frá byggingunni. BBC segir að óstaðfestar fréttir hermi að fjöldi fólks hafi særst í sprengingunni. Stór bílasprengja sprakk í höfuðstöðvum lögreglunnar í Abuja í júní.