Man. City keyrði yfir Tottenham á White Hart Lane

Manchester City heldur áfram að spila frábærlega á þessu tímabili, en þeir keyrðu yfir Tottenham, 5-1, á White Hart Lane, heimavelli Tottenham í dag.

Það var Edin Dzeko, framherji Man. City, sem gerði fyrstu þrjú mörk leiksins og náði því í fyrstu þrennuna fyrir Manchester City.

Samir Nasri, leikmaður Manchester City, var í byrjunarliði gestanna en hann lagði upp fyrstu tvö mörk Dzeko og virðist smellpassa inn í liðið.

Sergio Aguero gerðu fjórða mark Manchester City í leiknum og aftur var það Nasri sem lagði upp mark Aguero.

Tottenham náði að minnka muninn þegar um tuttugu mínútur voru eftir af leiknum þegar Younes Kaboul skoraði fyrir heimamenn.

Edin Dzeko skoraði síðan fjórða mark sitt í leiknum nokkrum sekúndum fyrir leikslok og niðurlæging heimamanna staðreynd.

Man. City eru með fullt hús stiga eftir þrjár umferðir með níu stig í efsta sæti deildarinnar.

Tottenham Hotspurs hefur aðeins leikið tvo leiki á tímabilinu en liðið hefur tapað þeim báðum.



Staðan í ensku úrvalsdeildinni