Stoke enn taplaust eftir sigur á West Brom

West Brom er enn án stiga í ensku úrvalsdeildinni eftir að hafa tapað á lokamínútunum í þriðja skiptið í jafn mörgum leikjum í upphafi tímabilsins. Í þetta sinn fyrir Stoke.

Ryan Shotton skoraði sigurmark Stoke í leiknum í dag en það gerði hann á 89. mínútu. West Brom hafði áður tapað fyrir Manchester United og Chelsea á lokamínútunum og er því enn stigalaust í deildinni.

Sigurmark Shotton var þó umdeilt þar sem að leikmenn West Brom vildu meina að Ben Foster, markvörður liðsins, hafði verið kominn með báðar hendur á boltann áður en Shotton náði til hans.

Stoke er að sama skapi taplaust og hefur byrjað tímabilið vel. Liðið er nú í níunda sæti deildarinnar með fimm stig.

Shane Long fékk besta færi West Brom í leiknum en Asmir Begovic varði vel frá honum. Jermaine Pennant komst einnig nálægt því að skora í leiknum en skalli hans fór rétt svo fram hjá marki heimamanna.

Staðan í ensku úrvalsdeildinni