John Henry: Liverpool árum á eftir keppinautunum

John Henry, eigandi Liverpool, telur að félagið sé mörgum árum á eftir helstu keppinautum liðsins. Það sé því of snemmt að hugsa um enska meistaratitilinn.

Manchester United er núverandi Englandsmeistari og spá margir því að liðið verji titilinn í ár. Þá er Manchester City með ógnarsterkan leikmannahóp auk þess sem að Chelsea er öflugt sem fyrr.

„Manchester United hefur tekist ótrúlega vel til og er með ungan en mjög breiðan leikmannahóp - og afar hæfileikaríka leikmenn,“ sagði Henry við enska fjölmiðla.

„Ég horfði á nokkra leiki þeirra á undirbúningstímabilinu og þeir virtust vera í toppformi, jafnvel þá.“

„Við erum bara nýbyrjaðir að byggja upp okkar lið og erum mörgum árum á eftir United-mönnum. Við eigum því ekki von á því að vinna enska meistaratitilinn í ár.“

„Manchester City virðist hafa endalaust fjármagn til að kaupa stjörnuleikmenn í hverja einustu stöðu. Það verður erfitt að jafna það. Markmið okkar í ár verður að komast aftur í Meistaradeild Evrópu.“

„En meira að segja það verður mjög erfitt. Það eru sex af sterkustu liðum Evrópu að keppa um efstu fjögur sætin í ensku úrvalsdeildinni.“