Hver er Francis Coquelin?

Francis Coquelin er óvænt í byrjunarliði Arsenal í stórleiknum gegn Manchester United í dag en aðeins þeir allra hörðustu kannast við þetta nafn.

Coquelin er tvítugur miðvallarleikmaður og spilar sem varnartengiliður í dag. Emmanuel Frimpong byrjaði tímabilið í þeirri stöðu en tekur út leikbann í dag.

Coquelin er franskur unglingalandsliðsmaður og á að baki fjóra leiki með aðalliði Arsenal. Hann kom til félagsins árið 2008 en var allt síðasta tímabil í láni hjá Lorient í frönsku úrvalsdeildinni.

Hann þreytti frumraun sína með Arsenal í september árið 2008 þegar hann kom inn á sem varamaður fyrir Fran Merida í leik gegn Sheffield United í enska deildabikarnum. Arsenal vann leikinn, 6-0. Síðan þá hefur hann spilað einn leik í enska bikarnum en hina í deildabikarnum.

Leikurinn í dag er því frumraun hans í ensku úrvalsdeildinni og ekki ónýtt að fá að byrja gegn Manchester United á Old Trafford.

Leikbönn og meiðsli hafa sett stórt strik í reikning Arsenal í upphafi leiktíðar auk þess sem að félagið seldi tvo af sínum bestu miðvallarleikmönnum fyrr í mánuðinum - þá Cesc Fabregas og Samir Nasri sem fór á kostum með Manchester City gegn Tottenham fyrr í dag.