Dzeko: Við eigum enn meira inni

Edin Dzeko, markahetja Manchester City í leiknum gegn Tottenham í dag, segir að liðið eigi enn meira inni þrátt fyrir að sýnt allar sínar bestu hliðar í 5-1 sigri.

Dzeko skoraði fjögur mörk fyrir City í dag og liðsfélagi hans, Samir Nasri, lagði upp þrjú mörk í frumraun sinni með liðinu. Aðeins örfáir dagar eru síðan að City keypti hann frá Arsenal.

„Ég held að ég hafi síðast skorað fjögur mörk í einum leik með Wolfsburg í Þýskalandi,“ sagði Dzeko eftir leikinn í dag. „Þetta var mjög sérstakur dagur fyrir mig enda frábært að ná að skora fernu í leik í ensku úrvalsdeildinni.“

„Mér finnst að við séum að verða betri og betri. Við eigum meira inni og ég vona að okkur takist að sýna það í næstu leikjum. Við viljum vinna alla leiki.“