Wenger: Ég ætla ekki að hætta

Arsene Wenger, stjóri Arsenal, segir að hann ætli ekki að gefast upp og hætta hjá félaginu þrátt fyrir 8-2 tap fyrir Manchester United í dag.

„Mér líður eins og ég hafi verið niðurlægður,“ sagði hann eftir leikinn í dag. „Þetta var hræðilegur dagur. Liðið hrundi einfaldlega í seinni hálfleik.“

Hann segir að það hvarfli ekki að sér að hætta sem knattspyrnustjóri Arsenal. „Nei, það kemur ekki til greina. Ég veit að Englendingar telja að lausnin við öllum vandamálum sé að kaupa nýja leikmenn en staðreyndin er sú að okkur vantaði átta leikmenn í liðið í dag.“

„Það er sama hvaða lið á í hlut - ef átta leikmenn vantar þá fær maður að finna fyrir því.“