Redknapp: Modric vildi ekki spila

Luka Modric vildi ekki spila með Tottenham gegn Manchester City í dag, að sögn Harry Redknapp, stjóra Tottenham. Modric hefur verið orðaður við Chelsea í allt sumar.

Tottenham hefur hafnað tveimur tilboðum í Modric nú þegar en Chelsea keypti á dögunum Juan Mata til liðsins. Var þá talið að áhugi liðsins á Modric hafi minnkað.

Forráðamenn Tottenham hafa margítrekað að Modric fari ekki frá félaginu og var hann settur í byrjunarliðið gegn City í dag. City vann, 5-1, og Modric átti ekkert sérstakan dag eins og svo margir í liði Tottenham.

„Luka kom til mín klukkan hálf tólf í morgun og sagði að hann væri ekki í neinu ástandi til að spila leikinn - hann væri með hugann við annað,“ sagði Redknapp eftir leikinn.

„Ég sagði einfaldlega að ég þyrfti á honum að halda og hann yrði einfaldlega að spila. Ég sagði honum að það væru meiðsli í okkar leikmannahópi og að hann væri okkar aðalmaður.“

Redknapp grunar að Modric hafi verið ráðlagt af utanaðkomandi aðilum að spila ekki í dag. „Hann var í góðu lagi í gær þannig að það gerðist augljóslega eitthvað í millitíðinni. Hver veit hvað átti sér stað.“

Enskir fjölmiðlar fullyrða að Chelsea sé reiðubúið að leggja fram tilboð upp á 40 milljónir punda í Modric.