Hungurverkfallið í Indlandi á enda

Indverski mótmælandinn Anna Hazare endaði í gær 13 daga hungurverkfall sitt í kjölfar þess að ríkisstjórn landsins varð við kröfum hans. Á föstunni missti hann tæp 7 kíló.

Síðustu tvær vikur hefur umræðan í Indlandi snúist mjög um Hazare sem hóf hungurverkfall sitt til að krefjast umbóta í landinu. Hann var fyrst fangelsaður fyrir kröfur sínar en þá braust fram mikil mótmælaalda og tugþúsundir Indverja þustu fram á götur landsins til að krefjast þess hann yrði látinn laus. Þegar honum í kjölfarið var sleppt úr frangelsinu neitaði hann að yfirgefa klefann sinn nema hann fengi opinbert leyfi til að mótmæla og fasta opinberlega. Það fékk hann að lokum.

Kröfur Hazare voru helst að sett yrði á fót sjálfstæð rannsóknarnefnd til að berjast gegn spillingu í landinu. Síðastliðinn laugardag varð ríkisstjórn landsins við kröfum hans. Í gær rauf hann föstu sína. Myndum af því þegar hann bar könnu af kókoshnetusafa og hunangi að vörum sér var sjónvarpað um allt Indland.

Hazare var fluttur á spítala til skoðunar, en hann hefur heitið því að „vera á vaktinni" allt þar til ríkisstjórnin hefur komið umbótatillögunum gegnum þingið.