Capello hefur augastað á ungu leikmönnum United

Danny Wellbeck, leikmaður Manchester United, verður ekki með enska landsliðinu gegn Búlgaríu og Wales í undankeppni Evrópumótsins í Póllandi og Úkraínu árið 2012, en hann tognaði í aftanverður læri í leik gegn Arsenal um helgina.

Welbeck hefur verið magnaður í byrjun tímabilsins og skorað mikið fyrir Englandsmeistarana. Fabio Capello, landsliðsþjálfari Englendinga, hefur gefið það út að hann hafi mikið álit á þessum unga framherja og að leikmaðurinn sé í framtíðarplönum landsliðsins.

Jermain Defoe, leikmaður Tottenham, kemur inn í enska hópinn í hans stað. Capello hefur augastað á fleiri ungum leikmönnum  Manchester United, en þeir Phil Jones, Tom Cleverley og Chris Smalling voru allir valdir í enska landsliðið.

„Phil Jones er álíka hæfileikaríkur og Jack Wilshere,“ sagði Capello við fjölmiðla ytra.

„Þetta er leikmaður sem hefur leikið óaðfinnanlega á stóra sviðinu. Honum líður vel með boltann og sjálfstraustið skín af honum, en það er erfitt að finna slíka leikmenn“.

„Hann kemur ekki strax inn í byrjunarliðið, en það mun án efa gerast bráðlega. Jones þarf bara að öðlast leikreynslu í ensku úrvalsdeildinni og þá verður þetta heimsklassa varnarmaður“.